restaurante altamira

Vilagarcía é unha praza complicada para facerse un lugar nas guías gastronómicas. Case todas as recomendacións desprázanse ao norte (Carril), ou ao sur (Cambados).
Lembro outros tempos en que o Altamira estaba sempre aí, entre o Chocolate e Loliña

 

Onte comemos no restaurante (Marisquería, anúncianse eles mesmos) Altamira e non acabo de explicarme moi ben a súa actual falta de notoriedade. Mantén o tipo máis que dignamente. O comedor, dentro do clasicismo, está perfectamente actualizado; pedimos mesa ao fondo, no reservado, a carón da cheminea, para que Luis e Luz quitasen a humidade que traían nos ósos.

  

A verdade é que estivemos moi a gustiño. A carta, como corresponde á súa dependencia do mercado diario, recitada e con recomendacións; non moi extensa pera si variada e suficiente. Os viños tamén ditos de palabra por denominacións; pedimos un ribeiro e o resultado é un Vilerma de 2009.
Cociña baseada no produto cunha elaboración tradicional impecable.


Comezamos cunhas ameixas con allo.
Son como en prebe verde e están fantásticas.
Fresquísimas, da ría e directamente do viveiro
Creo que me paso un pouco mollando na salsiña.



Unha nécora (mediana) por cabeza.
Catro femias como catro soles.
Tamén da ría de Arousa con paso polo viveiro ata o momento da cocción (chegan á mesa mornas)
Tres moi boas e a cuarta non tanto. Tócalle a Luz…


Peixe sapo guisado.
O guiso, saborososísimo.
O peixe sapo non é das miñas debilidades peixiles pero recoñezo que está no seu punto, coa textura perfecta.
De novo me paso co pan.

A oferta de sobremesas caseiras, moi ampla, coidada, rompe todas as espectativas.

   

Browni
Cuarteróns de mazá asada con xeado e chocolate quente
Cañas de crema
Xeado de turrón

Ata aquí, todo perfecto. Absolutamente recomendable, para repetir.
A discusión chega coa conta, con opinións bastante encontradas. Saímos por algo máis dos cincuenta euros por persoa e algún pensa que é un pouco de máis.
Volvemos ao de sempre. A cociña galega de produto (de produto autóctono de calidade) é cara. As ameixas e as nécoras da ría de Arousa, o peixe sapo, o celo por gardar a tradición… hai que pagalos.

Restaurante Altamira
Estrada Vilagarcía-Pontevedra, Rubiáns.
36619 Vilagarcía de Arousa
Teléfono: 986 503 481
GPS: 42º57’51”N 8º72’77”W
Localización en Mapas de Google