os furanchos de covas

Aproveitando estes días de vacacións, inauguramos a tempada de furanchos.

Descubro que por aquí, no Salnés, tiran máis pola denominación ‘loureiro’ que pola clásica de furancho.
En todo caso, o mesmo can…
Viño da casa (por esta zona branco Albariño e tinto Barrantes) e algo para empurralo. Normalmente as tortillas nas súas diferentes variedades, a zorza, a richada… nalgúns casos calamares, polbo… e pouco máis (e, para que máis?).

Hoxe deixo as indicacións para chegar á zona dos furanchos de Covas
Situándonos na autovía do Salnés, temos que saír onde marca vía rápida a Cambados e Vilagarcía (tamén a Armenteira). Xa na vía, moi cerca, aproximadamente un quilómetro, está a primeira rotonda, a de Ribadumia; esta rotonda é onde está a oficina de turismo e o aparcamento que utilizamos por este lado para a ruta da pedra e da auga.

Deixamos a rotonda pola saída contraria a onde está a caseta de turismo; percorremos pouco máis de un quilómetro e nunha curva á dereita está a desviación con letreiro a Covas (é a segunda, antes xa deixamos atrás outra indicación a Covas).

Por estrada xa bastante rural avanzamos outro quilómetro algo longo ata chegar ao segundo cruce; un pouco antes, á esquerda, atopamos un campiño que en temporada alta funciona como aparcamento.

A partir de aquí, xa so nos queda elixir porta e entrar.
Tanto a dereita como esquerda, cada casa coa póla de loureiro seca é un furancho.
Hainos mellores e peores, con máis oferta e con menos, máis coidados e tamén trapalleiros, en fin, aquí cada quen ten os seus gustos e quen manda é o viño.