Onte, para comer no Gastromanía, aparcamos a carón dunha especie de caravana que lucía o nome de A Tixola.
Uliscando que detrás pode haber algo interesante, e como can de présa, bótome a buscar información de primeira man; atópoa no seu propio facebook.
O novidoso proxecto autodefínese como 'a cociña responsable itinerante', nace da man de Nacho Rodríguez Bello (Gastromanía, Casa de Xantares) e Lucas Requejo (Prato DO), e responde ao antiquísimo principio universal de que se Mahoma non vai á montaña...
Toda unha declaración de intencións:
'Nunha ocasión escoitamos dicir a un cociñeiro trotamundos que levando unha tixola na mochila podía ir a calquer parte do mundo e facer feliz á xente, no noso caso é a tixola a que nos leva coa mesma intención, facer feliz á xente ainda que sexa por só un instante.' (do facebook de A Tixola).
As liñas de acción:
'A pé de praia ou “O Mar por Bandeira” (na Praia de Cabío en A Pobra do Caramiñal, do 26/07 ó 30/09/2013)´.
Ás Agachadas ou “A Vida son Experiencias” (onde ti queiras, a partir do 15 de outubro poderás realizar o teu soño).
E De Caminho, ou “ Percorrendo os caminhos, atoparemos O Caminho” (achegarse a calquer sitio de Galicia onde exista un camiño, coa entrada da primavera comezaremos a camiñar).' (do facebook de A Tixola).
En A pé de praia, a caravana sitúase nun piñeiral que fai as veces de comedor para 20 persoas, a estética é a dun camping e presenta diversas opcións moitas delas baseadas na grella con olor a fume e sabor ao mar de Arousa. Pratiños, racións, presadas... Percebes, navallas, tortilla, salpicón de peixe porco, vieira en masa de empanada, navallas con maniñas de porco...
A última etapa De Caminho, ata o momento, foi a Boimorto para o benéfico e cada vez máis prestixioso Festival da Luz.
Manuel Gago, nas súas Paparotas de Capítulo 0, dedicoulles unha pequena entrada na que, baixo o título de A Tixola: nostalxia do camping na Pobra do Caramiñal, nos descubría algunhas das claves do proxecto.
Seica isto das foodtrucks ou, o que é o mesmo, as caravanas gastronómicas móviles, están de moda e en Galicia entran da man de Nacho Rodríguez e Lucas Requejo.
Longa vida a esta comidacamióngalega.
(Nota: Neste caso todas as imaxes proceden do propio facebook de A Tixola; moitas delas veñen, á súa vez, de Capítulo 0)
